naideyah
Tuesday, October 30, 2007
خوش مقلب
السلام عليكم
اليوم رحت لدوامى
كأول يوم عمل بعد الإجازه
وإذا
اليوم الثلاثاء اخر يوم بإجازتى
والمفروض أباشر عملى
الأربعاء
يعنى غدا
والبنات يدرون وماقالوا لى
انا على حسبتى اداوم الثلاثاء
ومتعسره حيييييييييييييييييييل
وغاصبه روحى والله مو قادره ابطل عيونى
وصلت الدوام
شى شى مبخرين مكتبى
والفراش متشقق انى يايه والمكتب يلق يلق
واكتشف انى باجر المفروض اداوم
مو حره وقهر
وحجتهم البنات انى يايه يايه اليوم نقعد وياج ولهانين عليج
وشربت المقلب
لكن مردوه لهم
Sunday, October 28, 2007
تانى تانى تانى
راجعين للحيره تانى
والنار والعذاب والشغل
اليوم آخر يوم لى حريه
بعد إجازه طويله
وباجر برد للغثا والقعده الصبح
وزحمه الطريج
وملاقه مديرو
ومجابل الحلوات
وخاصه ام عيون ليزر
عطتنى اياها ليزر
خلتنى اعرى اكثر من شهر
فجأه التهاب وما اقدر امشى
والسبه كلمه طلعت وسهم ليزر
الله يعينى توها ريلى صايره زينه بعد علاج اكثر من شهر
ومجابل وحده بتغثنى بسوالف ريلها
----------------------------------
ودى اعدل نومتى ومو قادره
---------------------------------
شاديه
وايد استانس على اغانيها وخاصه القديمه مالت الافلام
والدلع لايق عليها
وانا احوس بالنت لقيت هالموقع المصرى يحليهم المصاروه ايونسون بالكتابه والحجى مليون كلمه بالدقيقه
ولقيت لها اذاعه اون لاين بس ما اشتغلت معاى مادرى ليش.
اهديها لكم
المفروض احط صوره شاديه تحت اهنى بس ماضبطت وياى وعصبت عليها وخليتها بمكانها
اشتغلت الاذاعه :)
الظاهر لازم احمر العين
Saturday, October 27, 2007
يا لزيز
cheese cake
yaumy
شريت هالشيز كيك
وعقب ما تفطرت
قلت بصير ذربه وباكل قطعه مع النسكافيه
لكن
تذوب فى فمك
لا فى يدك
كليت 3
وتعوذت من الشيطان
ولكن
باجر بعد الفطور
لنا لقاء:)
Monday, October 22, 2007
أول مره
قبل العيد شريت من محل متعوده اشترى منه
وقالت لى البياعه ان فى عروض حلوه
قلت لها عندج رقمى متى ما سويتوا دقى على
قالت لى على كل 100 تشترين لج 10 فرى
وانتى جمعى ويصير لج مبلغ محترم بعد العيد مرينا واخذى بهالمبلغ
المهم قلت اوكى
طلع لى 30 دينار فرى
استانست والله زين
قام حظى اخيرا
المهم
البياعه قالت لى فى كوبونات انا ضحكت وقلت لها استحاله انى افوز
ودى لو افوز عن خاطرى بماعون بلاستيك مافى ولا عمرى فزت
وومشيت لا عبيت كوبونات ولا شى
المهم
كان عندى تصليح ولاحظوا بالعشر الاواخر من رمضان
ورحت استلم الهدوم
وطلعت من المجمع ولا اييينى اتصال
المتصل : مدام انتى طلعتى من المجمع
انا : ايى ليش ؟ وبقلبى اقول عسى مو ناسيه شى ولا بالغلط ماخذه اغراض احد مالى خلق ارد مره تانيه
المتصله : لا الف مبروك انتى فزتى معانا
انا : شنووو ؟ بشنو ؟
المتصله : فزتى معانا بالسحب لسه سحبنا وطلع اسمك
انا : صج عاد
المتصله : مدام حياك الله باى وقت تسلمين اى بدله تبينها من المحل
انا : والله مو مصدقه
------------
اقول الخبر لاختى مو مصدقه من متى انا افوز !!
ما شاء الله لا قوه الا بالله لا انظل روحى بعد
المهم
أمس رحت وخذيت لى بدله ومو مصدقه لى الحين
وعندى احساس لما البسها راح يصير فيها ههههههههه شى
بس بحتفظ فيها للتاريخ
وأمس اول يوم بحياتى افوز ويطلع اسمى بشى
اللهم لك الحمد والشكر
Saturday, October 20, 2007
عذبه انتى يا كويتام بخنق زرى مفقوده
صاحبه مدونه عذبه انتى يا كويت
اللى يعرف اى شى يا ليت يطمنى
ام بخنق زرى لسان كويتى راقى
حقانيه وفريتها كبيييييره
صحيح ما علقت عندج ولكن كنت اتابعج كل بوست
الله يطمنا عليج وعساك بخير
والله يخليلج وليدج وبنيتك واميمتك
Thursday, October 18, 2007
ما ما نونه
ما ما نونه
كريمه مختار
استمتعت بالمسلسل مو عشان اشوف القصه العجيبه
ولكن لانى اعشق هالممثله احسها ام ام ام ماده ايدها للكل
ودى ادخل داخل الشاشه وابوسها
احساس صادق اداء راقى
حنان بلا نهايه
Monday, October 15, 2007
ولنا ميعاد للقاءولهانه عليك
ولهانه على قهوتنا الصبح
ولهانه على سوالفنا
ولهت على شوفتك
والأكثر انى ولهت على ريحتك
تدرى يبه
انى ظليت افكر بحياتى دونك وشلون بتكون مادريت انى
كل يوم افكر فيك او بالاصح ما تغيب عن عينى لحظه
وانا اكتب الحين صعب اقول ولهت عليك والاصعب اقول
احتاجك اكثر من اول
ودى اسولف لك شنو صار وصار بالسنين هذى
بس ادرى انك تدرى مو يقولون تحسون فينا؟
احبك وواحبك واحبك
واليوم فارقتنا من 9 سنين شلون الايام مرت
اتصدق يبه
فقدانك ذابحنى
بغيابك كل شى تغير
لا انا انا ولا للحياه طعم وكل شى صار ناقص
متى اشوف والمك حيييييييييييييييييييييييييييييييييييييييييييييييل
والله انى محتاجه اقط راسى على صدرك واقول يبه لا تخلينى
