naideyah

Monday, August 21, 2006

يا عينى يا عينى يا وزاره الطاقه



مساء الخير

اليوم الاثنين وانا كنت رايحه الدوام متأخره كالعاده ومتعسره لانى مو نايمه عدل اضافه للخدمات الجليله اللى المطلوب انى اسويها وفعلا قبل لا اروح دوامى خلصت شغل زميلتى ... طلبات وايد يمكن اخصص لها بوست اذا صرت خوش وحده وبديت اكتب هنى بل الكسل اللى انا فيه ...

المهم رحت الدوام متاخره وبشب لى فحمه ولا تقع اعيونى على الصرصار الصغير .. ووووووع وادق الجرس وازف الفراش واقول وين التنظيف اشوف الاوراق عفسه والبلاط مو ممسوح شنو هذى .... يلا تنظيف وتعقيم ابى اشم الديتول على بعد 100 متر .... وفعلا بو الكلام ما قصر اهو ويا ليتون وسهيل شمروا عن سواعدهم ... والديتول صار من بعد شقول جنه داخلين مستشفى مو مكتب ... المهم رجعت قوادى الى مكتبى ... وشبيت لى فحمه ثانيه وحطيت البخول وحطيت معمول حتى يشفط الريحه ... وبعدها البخور العادى مال المكتب ... والمبخره شغاله على عطر ....

هذا الجو او طقوسى كل يوم .. بس اليوم ماخذه وياى رطب برحى منصف :) وقهوه

المهم ما ابى اطول السالفه يو البنات عندى ودقت هلى زميلتى من اداره ثانيه وقلت لها يلا يا سمسمه حماتج تحبج القهوه موجوده وقالت لى اى والله هدووووء مافى شغل قلت انا لا والله عندى شغلات وايد بس حياج ويت وقالت لى نيديه شنو عندج اسمع ؟ قعدت اشوف شنو عندى بالكمبيوتر ولا اطيح على ام كلتووووووووم .... وقعدت اقول تبين انت عمرى ولا فكرونى .. ويصرخون البنات اييييييييييييييي نبى ام كلثوم وانا اطلع الاغنيه فكرونى وقاعده بامان الله اسوى شغى واللى تهذر اهنى واللى ساكته مع الاغنيه المقدمه الموسيقيه وفجأأأأأه

ظلام دامس .... ظلااااااام خرمس

طبعا انا قلت اااخ يا ثومه شغلى ضااااااااااع والكنبيوتر طفى ..

نطلع ولا شنو مافى المكاتب اللى على الشارع اهى اللى اشويه فى نور من شمس ربنا وانا خرمس مكتبى بالنص

طلعت لى فكره عشتو الضمير يحكم وشبيت ذيك الشموع جو جو رومانسى لان توه ما احتر المكااان

قعدت نص ساعه تقريبا بدا الجو يحتر ولا المنطقه كلها طافيه ادق ع البيت بعد طافيه الكهربا وليين وين اروح ولا مسئولى يقول ترى بعد ساعتين ترد الكهربا قلت يلا كلنا نطلع وفعلا نون النسوه طلعوا من المبنى امشى بالشارع ولا زحمه ودايما مكانا زحمه زحمه بس كل الادارات والهيئات اللى يمنا طلعوا اروح لللبيت امر على الفرع ولا هم خرمس .. اشترى منه برد .. وثلج تحسبا للطوارىء .. ارد البيت

اقعد اشى اتصل على الطوارىء ولا يرد على واحد ويقول لى .. ساااعتين قلت له شنو ساعتين ولى متى وكم مر من الساعتين وانا اكلمه ولا تشب الكهربا ... والحمدلله

الصوره .. مكتبى بالفلاش عن طريق كاميرا الموبايل ..


وبس شصار لكم اليوم مع قطعه الكهربا ؟

Posted by nadeyah :: 10:47 AM :: 13 Comments:

Post / Read Comments

---------------oOo---------------

Monday, August 07, 2006

واى قهـــــــــــــــر


اليوم الساعه 1:10
قرر المسؤول المبجل انه يسوى لنا اجتماع للفريق
المهم رحنا عنده ولا نافش ريشه عسى ماشر والدوام ويا طلابه الدوام ولا زم تلتزمون
طالعته وقلت له منو موجود غيرى من البنات الحين ؟؟ او بالاحرى الموظفين غيرى انا و 2 موظفين من الجنسيه المصريه

قال لى ما اقصدج بس نبى الالتزام .... يعنى الكلام لج يا جاره

المهم وفجأه يقط لى الطامه الكبرى انه الموظفه اليديده المنتقله لنا طلبت اعفائها من التوقيع وبالتالى مالها توقيع عشان ما تزعل !!!!!!

انا حسيت ان عيونى بتطلع لييييييييييش ينى ؟؟

وبالمقابل انا شلت اسم المهندسه اللى ماسكه القسم الفلانى لانها منتظمه بالعمل وقلت لها بكيفكم حضوركم وغيابكم ؟؟؟؟؟؟؟


يعنى شنو ........
ولما شديت وياه على تقسيمه الشغل بدينا بالديباجه محد ماسك الشغل مثلج ووووو

حسيت انى بموووت وقلت طالما الوضع جذى اشيل عمرى اروح البيت افكر شلون اتكلم معاه ... ليش انى ساكته واشتغل جذى



صج قهر

Posted by nadeyah :: 7:52 AM :: 5 Comments:

Post / Read Comments

---------------oOo---------------

Wednesday, August 02, 2006

تهاوشوا القطاوه على سبه حلاوه ..!!!

السلام عليكم
من فتره بدوامى العزيز .. باحدى الوزارات حاشنا طشار التدوير
وشالوا الوكيل مالنا ... حطوه بالفريزر ويابولنا واحد يديد توهم مطلعينه من الفريزر بعد تجميد لعده سنوات
المهم كانت حووووسه وخلطبيطه منو بيظل وشنو راح يصير
وكيلنا أبى واستنكر وقال انا ظال بمكانى وياويله اللى يجيس مكتبى!!!!

وطبعا الوكيل اليديد داوم ... وين بيقعد ؟؟؟؟؟


قعد بغرفه الاجتماعات ما عنده مكتب

وتخيلوا ساعات يكونون اثنيناتهم موجودين .... قدامنا السلام والسوالف.... والله هذا احلى شى بالرياييل يجاملون مو مثلنا الحريم ما نعرف نجامل كلش...

الزبده الوضع مستمر والوكيل القديم قفل على مكتبه .... تخيلوا الوضع


واحد من الموظفين وز الوكيل شرايك يا بو فلان ننتقل لمبنى احلى ؟


وهناك لك مكتب وسكرتاريه ووو غرفه اجتماعات ومبنى كبير


طبعا شاف الوضوع وعجبه


وجك بم يومين ويلا شيلوا قشكم بننقل

...آآآآآآآآآآخ من صجكم كم قسم كم إداره بتنتقل على سبه هواشكم يالقطاوه صج صج ماكو سنع ولا عقل

بعد عيب عيب هالسوالف .. رياييل اكبار جذى .. يعنى يبا مو مكتبك شارى الارض بفلوسك ؟؟ وما عمرها صارت


ما اطول عليكم تشتت 4 ادارات غيرنا احنا مكتب الوكيل باقسامه وملفاتنا وقشنا وشيل


ويومين وانا انقل بمكتبى .. ضبطته بس صار نا اسبوع ولى الحين حاسه انى ضايعه مو مستقره

التغيير جذى عفس الدنيا .. البداله والتلفونات اعتفست

اتصدقون ما عندنا فاكس ؟؟

لان الفاكس تركناه اهناك للوكيل المجمد ؟؟؟

لووووويه وعفسه ....


والله المعين

Posted by nadeyah :: 1:57 PM :: 3 Comments:

Post / Read Comments

---------------oOo---------------